CA SI FOSSE …
Sta tutto scritto
sta tutto signato.
Chi pe’ na mano
chi pe’ n’ata mano …
Chello pe’ cchesto
e chesto pe’ chell’ato …
Sta tutto scritto
sta tutto signato.
Ma addò sta scritto?
Addò vene signata
na sorta trista
ca te nchiova ncroce?
E chi è stu nfamo,
st’anema dannata
ca segna e scrive
dint ‘a chistu libro
e ca dice:
« Mò tu! »,
« Tu no! »,
« Tu si! »?
Nun se trova na pagina caduta,
vulata all’intrasatta
‘a dint’ ’0 libro:
nu fuglietto,
n’appunto …
nun se trova nè pe’ Il’ aria
nè nterra.
Ca si fosse …
ca na pagina sola se truvasse,
cu n’appunto signato,
na parola,
se putesse
cu certezza sape’
qual’è ‘a mano ca scrive,
e se sapesse
si scrive cu nu scopo
na ragione
o pe’ sfizio sultanto
o sulamente pe’ malvagità …
Addò sta scritta
addò vene signata
na sorta trista
ca te nchiova ncroce?
E addò se mette ‘a sciorta
pe’ nun se fa’ vede’
primmo d’ ‘o tiempo,
primmo d’ ‘o juorno
ll’ora
e d’ ‘o mumento
ca t’addà zumpa’ ncuollo
a tradimento?
Se mette dint’ ‘a voce,
mmiez’ ‘e pparole toie,
sott’ ‘e penziere,
se mmesca mmiez’ ‘e mmosse ca tu faie,
dint’ ‘e resa te ‘e quanno si’ felice …
e quanno s’annasconne
nun t’ ‘o dice.
Eduardo de Filippo ‘O CANISTO – Edizioni Teatro San Ferdinando 1971